في عيد المرأة اهدي هذه لافضل مرأة ~امي~ .. كرمانة في عيد المراة هذه هدية لأعظم مرأة أمي الغالية وهي هدية لكل الأمهات أتمنى أن تنال إعجابكم
جيت نكتب الكلمات خانتني *** وراح وتلف عليا الكلام
بصح نقول ألي للفم لحقتني *** ونوصل رسالتي والسلام
راني نحكي علا لي في بطنها حملتني *** تسعة أشهر بالتمام ...
ومن حليبها رضعتني *** حتى وصل وقت الفطام
شحال من نهار عافرتني *** ومنقدرش نحصي ذوك ليام
إذا مرضت في فراشي تساميني *** وتبات تتسنى في ولدها ينام
حتى ولوكان بعيد وما تشوفيني ***تحسي بيا وتحسي بالألام
وإذا غبت ديما تسقسي عني ***متريح ميروح عنها تخمام
درتي لي عليك وكبرتيني ***وربيتيني يوم بيوم عام بعام
ووقت المدرسة كي دخلتيني ***تلبسي وتغسلي لذاك الغلام
إذا مهموم هيا لتواسيني*** وتزينلك القعدة والمقام
والمصروف إذا مكانش تعطيني ***وتمد الكاينة بالتبسام
يالي طيبتك راهي حيرتني ***وقلبك بيض ماهوا فحام
وحنانتك راهي دوختني ***تقول عسل باليدام
قلبك لو كان فيه يساوموني ***نقولهم هاذا معندوش سوام
وضحكتك لو كان فيها يكلموني ***ما نسمعلهم هدرة ولا كلام
وقعدتك لوكان فيها يعطوني *** الدنيا كاملة بالتمام
نقوللهم ياو روحوا بعدوني *** هاذي أم ما نمدها حرام
من غيرك يحبلي الصلاح ويعلمني *** من كل زينة وتكرهني فالخصام
ما تحلالي دار حتى تجاوريني *** وبلابيك تسماطلي ليام
مذا بيا ديما تقابليني *** فالصح ولا حتى المنام
كي تفرحي راكي تفرحيني *** ولزعفتي الدنيا تولي ضلام
ياربي إرحمها وإرحمني *** وخليها تطير فالجنة كالحمام
وعلا النار بعدها وبعدني *** وبدعوتي هاذي نختم الكلام